اسلام آباد۔26اکتوبر (اے پی پی) وفاقی وزیر برائے ماحولیاتی تبدیلی سینیٹر شیری رحمان آکھیا جو عمران خان لانگ مارچ دا نی لاہور توں اسلام آباد شارٹ مارچ دا اعلان کیتے، اگر انہاں دی عمران بچاؤ تحریک اتنی مقبول اے تاں پیپلز پارٹی وانڳ کراچی توں اسلام آباد مارچ کر تے ݙکھاون۔ انتخابات آئین دے مطابق ویلھے تے تھیسن۔ بدھ کوں آپݨے بیان اچ انہاں آکھیا جو میں تحریک انصاف کوں چیلنج کیتا ہئی جو او پیپلز پارٹی جیھا لانگ مارچ نی کر سڳدے۔ انہاں دا شارٹ مارچ جی ٹی روڈ توں شروع اتے جی ٹی روڈ تے مُک ویسی۔ عمران خان کوں پتہ اے جو لوک انہاں دی انتشار دی سیاست دا حصہ نی ٻݨݨ چاہندے، 25 مئی اتے 21 اکتوبر کوں لوکاں باہر نہ نکل تے تحریک انتشار دی کال کوں مسترد کیتے۔ ایں واری وی ناکامی تھیسی۔
