اسلام آباد۔10اگست (اے پی پی) وزیراعظم محمدشہباز شریف آکھیا جو عمران خان دے دور اچ اساݙی خارجہ پالیسی دا ٻہوں ضیان تھیے، امریکی سازش دا بیانیہ کوڑا اے۔ بھارت نال تعلقات کشمیر دے منصفانہ حل دے بغیر معمول تے نی آسڳدے۔ خمیس کوں وی نیوز کوں ݙتے ڳئے انٹرویو اچ وزیراعظم آکھیا جو اساݙے برادر ملک اساں توں ناراض ہن، عمران خان سعودی عرب سویں ملکاں نال وی تعلقات خراب کیتے۔ وزیراعظم آکھیا جو سعودی عرب کوں ݙکھاوݨ کیتے کوشش کیتی ڳئی جو ہک بلاک ٻݨایا ونڄے اتے اوں بلاک نال سعودی عرب کوں کلھا کیتا وںجے۔ ہک سوال دے ولدے اچ وزیراعظم آکھیا جو ݙوہیں برادر ملکاں اچ اتنی خراب صورتحال پہلے کݙاہیں وی سوچیا وی نہ ویندا ہا پر عمران خان دے دور اچ تھئی۔ وزیراعظم آکھیا جو اگر سائفر دے مندرجات جیڑھے (بین الاقوامی اخبار) اچ چھپین او درست ہن تاں اے ہک ٻہوں وݙا جرم اے۔ بین الاقوامی جریدے ’’دی انٹرسیپٹ‘‘ اچ سائفر بارے چھپݨ آلی خبر بارے سوال تے انہاں آکھیا جو سائفر بارے قومی سلامتی کونسل دے ݙو اجلاس انہاں دی سربراہی اچ تھیے۔ ہک اجلاس اچ اوں ویلھے دے پاکستانی سفیر اتے اڄوکے سیکرٹری خارجہ اسد مجید آکھیا جو انہاں دی امریکی عہدیدارا ڈونلڈ لو نال ملاقات اچ سازش دی کوئی ڳالھ نی تھئی۔ وزیراعظم آکھیا جو اوں ویلھے دے سپہ سالار جنرل قمر جاوید باجوہ اتے سروسز چیفس وی تائید کیتی ہئی جو پاکستان دے خلاف سازش کائنی تھئی۔ عمران نیازی دا اے بیانیہ ہئی جو امریکا انہاں دی حکومت ڈہاوݨ دی کوشش کیتی کیونجو او چین اتے روس آلے پاسے زیادہ راغب ہن۔ وزیراعظم آکھیا جو امریکی سازش نال خوانخواستہ اساݙی حکومت ٻݨدی تاں اساکوں روس توں تیل ملدا؟ اساݙے چین نال تعلقات بحال تھیندے جئیں کوں عمران نیازی تباہ کر ݙتا ہئی؟ عمران نیازی بعد اچ آپ آکھیا ہئی جو امریکا کوئی سازش نی کیتی، ہݨ انہاں دے پہلے بیان کوں منیسو یا ݙوجھے کوں؟ اگر خوانخواستہ امریکی سازش نال اے حکومت امدی تاں اساں کیتے ٻݙ مرݨ دی ڄاہ ہئی۔ بھارت نال تعلقات بارے ہک سوال دے ولدے اچ انہاں آکھیا جو کشمیر دے مںصفانہ حل ڳولیے بغیر رابطے بحال نی تھی سڳدے کیونجو آپݨے حق کیتے کشمیریاں دی ٻہوں قربانیاں ہن ۔ وزیراعظم آکھیا جو کشمیریاں دا حق خودارادیت دا مسئلہ حل تھیے بغیر ہندوستان نال تعلقات معمول تے نی آسڳدے۔
