اسلام آباد۔28 جولائی (اے پی پی) وفاقی وزیر اطلاعات تے نشریات عطاء اللہ تارڑ آکھیا جو ڈاکٹر عافیہ صدیقی متعلق نائب وزیراعظم تے وزیر خارجہ اسحاق ڈار دے بیان کوں سیاق و سباق توں ہٹا تے پیش کیتا ڳئے، ڈاکٹر عافیہ صدیقی دے معاملے اچ حکومت سفارتی تے قانونی مدد کریندی پئی اے، ایں معاملے تے پیشرفت کیتے وزیر قانون دی سربراہی اچ کمیٹی وی بݨائی ڳئی اے، اسحاق ڈار شوگر ایڈوائزری بورڈ دے رکن نئیں، ایں بارے اچ خبر درست نئیں، کرپٹو کرنسی دی ریگولیشن بارے نظام ٻݨایا ڳئے، کرپٹو کرنسی بارے مفتاح اسماعیل دا بیانیہ زمینی حقائق دے برعکس اے۔ سنوار کوں ایں موقع تے میڈیا نال گالھ مہاڑ کریندیں ہوئیں وفاقی وزیر اطلاعات آکھیا جو نائب وزیراعظم تے وزیر خارجہ اسحاق ڈار بارے غلط خبر ݙتی ڳئی جو او شوگر ایڈوائزری بورڈ دے رکن ہن، ایں طرح دی خبر ݙیوݨ توں پہلے ریکارڈ چیک کر گھنݨا چاہیدے، سینیٹ دے اندر ہک سوال کیتا ڳیا جئیں دا جواب محکمہ تحریری طور تے جمع کروایا، جو وی معاملات ہن او تحریری طور تے فلور آف دی ہاؤس تے موجود ہن۔ انہاں آکھیا جو شوگر ایڈوائزری بورڈ دی تشکیل کوں پڑھ گھنݨا چاہیدا ہا۔ انہاں آکھیا جو کرپٹو کرنسی دی ریگولیشن بارے نظام وضع کیتے، کرپٹو کونسل بݨائی ڳئی، قوانین بݨائے ڳئے۔ کرپٹو دی پاکستان دے اندر گروتھ اے، ماضی اچ اساں ݙٹھے جو اساݙے دشمن کرپٹو بارے اقدامات تے سوال چاتے، مفتاح اسماعیل دا وی اوہی بیانیہ اے جو انڈیا دا کرپٹو بارے اے۔ وفاقی وزیر آکھیا جو کرپٹو ہک ریگولیٹڈ انڈسٹری اے، ایں دے باقاعدہ قوانین بݨائے ڳئن، ہک ودھدا ہویا شعبہ اے، ایں بارے بغیر تحقیق دے گالھ کرݨ، کہیں تے بلا وجہ الزام لاوݨ دشمن دا ایجنڈا اے، پاکستان دا نئیں ۔ انہاں آکھیا جو پاکستان دی معیشت ترقی کریندی پئی اے تاں شاید انہاں کوں ہضم نئیں تھیندی پئی۔ ہک سوال دے جواب اچ وفاقی وزیر آکھیا جو ڈاکٹر عافیہ صدیقی بارے نائب وزیراعظم اسحاق ڈار دے بیان کوں سیاق و سباق توں ہٹا تے پیش کیتا ڳئے، ڈاکٹر عافیہ صدیقی دی رہائی کیتے پاکستان سفارتی تے قانونی مدد ݙیندا پئے۔ انہاں آکھیا جو ڈاکٹر فوزیہ صدیقی دی وزیراعظم نال ملاقات تھئی، ایں معاملے تے پیشرفت کیتے قانونی کمیٹی وی ٻݨا ݙتی ڳئی اے، وزیر قانون ایں کمیٹی دے سربراہ ہن۔ عطاء اللہ تارڑ آکھیا جو ڈاکٹر عافیہ صدیقی دی رہائی کیتے جتنی کوششاں ایں دور اچ کیتی ویندن پئن شاید ای کݙاہیں کہیں دور اچ تھئی ہوون، اسحاق ڈار وی وضاحت کر ݙتی اے، انہاں دے بیان کوں سیاق و سباق توں ہٹا تے پیش کیتا ڳئے، اے مخالفین دی سازش ہئی۔
